الحلقة الأولى: شفيق العجلاتي والعدو الأمريكاني!

الحلقة الأولى:

شفيق العجلاتي والعدو الأمريكاني!

اليوم: مش فاكر..

الساعة: مش لابسها...

المكان: خير اللهم أجعله خير... أه أنا في بيتنا... قصدي في بيت من بيوتي

نزلت النهاردة الصبح أجري حوالين المنطقة عندنا كنوع من الرياضة... أصل أنا راجل عجوز بس إية رياضي جداااا... ممكن أعمللي 1200 جري كدة كل يوم ولا حاجة... إحم محدش يسأل 1200 إية بالظبط ... أصل أنا راجل حويط وواصل و مش أي حاجة أقولها كدة ببساطة. المهم... وأنا بجري بقا ومندمج كدة قلت أقف أولعلي سيجارة، أصل ما بتفرقش معايا يعني أشرب سجاير وأنا بجري يعني... الدهن في العتاقي ههههههه.

المهم بأضرب بعيني كدة لاقيت واحد كبير في السن قاعد ع الرصيف وماسك بيبسي اللي هو في علبة صفيح دة ومحتاس فيها مش عارف يفتحها... قلت أروح له أشوف مالو... أصل أنا بحب أساعد الناس.. وطيت عليه وقلت له مالك يا عمو محتاج حاجة؟ الراجل مردش عليا وشاورلي بقرف علي صفيحة البيبسي. قلت لنفسي ده بيتنك على إيه ده... سألته تاني "يا عم الحج محتاج حاجة؟" بصلي مردش... الدم غلي في عروقي... (أصل أنا دمي أحمر حامي)... قولتله يا راجل يا معفن بتتنك على إية ده أنا جاي أساعدك في فتح صفيحة البيبسي اللي أنت محتاس فيها دية... يقوم الراجل الناقص يبوص لي ويحود وشة الناحية التانية وقال عامل مذهول قال... معرفتش أمسك نفسي بقا (أصلي مبيهمنيش) وقمت ماسكة من قفاه مسكه حرامية كدة وزعقت بعلو حسي (أصل أنا صوتي عالي زي الشباب بالظبط) قلت له " بقا مابقاش إلا أنت يا حيوان يا منحط يا إبن الـ.... مش محترمين (أصل أنا محترم... بس مبيهمنيش)... دة أنا أحبسك وأوديك ورا الشمس... كل دة والراجل ساكت ولا نطق.

الناس إتلمت وطلعوا الراجل من تحت إيدي بالعافية... فيييييين طلع عمو العجوز أخرس والناس الهبل قال بيغلطوني أنا... طب وأنا مالي يا متخلفين ماقاليش ليه أنه أخرس من الأول كنت فتحت له الصفيحة وأمشي على طول و يا دار ما دخلك شر؟ ولا هو جر شكل وخلاص؟... هو أنا فاضي لأشكاله. وبعدين بعد أما ركزت مع نفسي شوية أكتشفت إني كنت ضحية مؤامرة زرقا... أيوا زرقا أصل البيبسي أمريكاني عامله الأمريكان ولاد الـ ... ولا بلاش... هي ديه خطتهم... يحطوا الهباب السم الأسود بتاعهم في علب صفيح مقفولة جامد عشان أقع أنا في الراجل الغبي دة وأتخانق معاه ويشوهوا صورتي قدام الناس... ومش بعيد يكونوا عاملين كدة عشان الناس تتخانق مع بعضها... فرق تسد!!! أه يا شياطين يا ولاد الأبالسة... مش بعيد يكونوا بيوزعوا بيبسي ببلاش في اأفغانستان... وفي العراق على الخرس الشيعة والسنة... بس على مين... كشفت المؤامرة بتاعتهم خلاص.. (أصل أنا لماح)... من هنا ورايح حشرب ليبتون وبس.

المهم خلاص نفسي إتسدت بعد 9 ساعات جري بس...

وصحيت من النوم... قصدي روحت بيتنا...

مفكرة: لازم أشتري كورركتور عشان الفضايح... يوووووووووه قصدي الأخطاء الإملائية.