زمن الملوخية

غنوا غنوا يا أفندية
زمن الكوسة بقا ملوخية
غنوا خلاص ماهم قطعوا النور
والعتمة اتكتبت عليك وعليا
غنوا الأخضر غطى الصحرا
غنوا خلاص كدة زمن الفقر
كله إتساوى تحت الجزمة
وكلة اهو عايش من غير لازمة
غنوا غنوا يا أفندية
زمن الكوسة بقا ملوخية
كبير العيلة بقا منحكم
وإدانا الحق نتكلم
وبقينا أحرار خلاص يا ولاد
بقينا نختار في أي ميعاد
يا نعيش ساكتين تابعين خايفين
يا نموت موتة سهلة برصاصة مطاط
غنوا غنوا يا أفندية
زمن الكوسة بقا ملوخية
غنوا إية لا، أرقصوا كمان
أرقص في الشارع و ياريت عريان
هز يا باشا وهزي يا هانم
ماهو الضمير بيشخر نايم
وأوعى الجامع تزوره رجليك
أمن الدولة *** عليك
غنوا غنوا يا أفندية
الملوخية بقيت وطنية
غنوا يا شباب الجامعات
غنوا يا رجالة يا ستات
غنوا يا عمال غنوا يا فقرا
غنوا بحق الليلة الغبرا
غنوا وقولوا عايزين إية
علوا صوتكم ساكتين لية
قولوا لية نفسكم مكسورة
اصرخوا غيروا أم الصورة
ولا خايفين من الكبير؟
اللي نهبنا و سرقنا كتير؟
ليكوا الحق الكل يخاف
ماهو فرعون عمره ماخاف
يلا عيشوا أحلام وردية
ملهاش مكان وسط الملوخية
يلا خلوا الرزق على الله
وكل واحد يرضى قضاة
من جزمة لجزمة راح ننداس
ومن كل كبير يحمينا الله
وغنوا غنوا يا بهوات
الشعب إتخدر من الملوخيه
الكتمة داست الأنفاس
والكلمة تحبس كل الناس
وكلة معاك تحت المداس
معلش حتتعب
إختار المقاس....